肥妹:致廿幾歲的你,中哂就認老吧

上回(肥妹:廿歲過咗幾年,初老已經不知不覺來到你的工作中)講到,廿幾歲嘅你我,初老症開始浮現在工作中。

買書變買樓

其實,除咗18-24廣告睇唔到之外,記性差咗,易肥咗,身體孱弱咗⋯生活上好多事都話你聽:致廿幾歲的你,老了。
開始睇到target 25歲以上嘅廣告。

哈哈。除此之外,有無發現以前會被學生哥攔住問你:係咪賣輸(書)呀?(我都想)。慢慢變成西裝友攔你:係咪買瘤(樓)呀?(我都想)。可能你唔認同,因為仲有學生哥攔你問:係咪賣書呀?有無諗過你正想暗爽之時,聽清楚其實係:係咪賣書呀⋯幫小朋友?(!!!)

 

新派台歌曲都係未聽過

以前成日笑大人聽埋晒d舊歌,其實漸漸地,自己都只聽舊時嘅「新歌」。是咪好耐無update你嘅playlist?就算有update,載入嘅仍然是十年前陳奕迅、許志安、梁漢文嘅歌(劉德華、郭富城果啲就唔講啦)嘅歌?唱k果陣禁極新派台歌曲,除咗羅生門念念不忘,都無首識,人樣仲好陌生。咦,依個名未聽過嘅。咦喂,依個咩人黎?下歌手?韓國人黎架?

 

覺得齊陰唔再適合自己

以前(幾耐以前?)好流行嘅齊陰,大概每個你我都剪過吧?到咗某個年齡,開始覺得唔適合再剪,都唔敢再剪。學depp ng唱句如不可改變面型就換個新髮型,人大了成熟了,連髮型都想轉轉。長髮嘅會想剪短,短髮嘅會留長。曾經齊陰嘅你,慢慢將前陰留長然後撥埋一邊。

不過,都唔係個個覺得齊陰唔岩自己嘅,有啲人一把年紀(廿幾歲)仍然努力保持齊陰(男女皆適用),唔知係咪想睇落去後生啲呢?但個啤酒肚出賣晒你啦(笑)。無論如何,我都好欣賞佢地,可以無懼世人目光,忠於自己。

 

開始被問:幾時到你呀?

以前好恨身邊人結婚,因為新年可以逗多啲利是。直至一個中學同學派利是俾我,都仲係咁諗XD。但講多謝晒之後,就會被問:「幾時到你呀?」、「結婚未呀?」。

除此之外,祝福語都開始變成「早日成婚」、「連生貴子」、「三年抱兩」等等等等⋯⋯。最悲哀是,最近約個親戚食餐飯,佢嘅反應係驚訝帶點恐懼:「你好事近呀嘛?要派帖?」。未結婚係咪唔洗食飯?

 

過時過節,唔想再出街。

就在幾年前,好喜歡聖誕節倒數、新年倒數、迫年宵。過時過節,會覺得要趁機會「造反」,要出去圍威喂,要感受一下節目氣氛,磨到通宵達旦,再睡個天昏地暗就好滿足。

過咗這樣的幾年,到現在,莫講身體上承受不了,時間金錢都負擔不起,有時間寧願攤多陣,有機會就陪家人食飯,畢竟食一餐就少一餐。情人節嘜節乜節唔想被商業化,生日慶祝咗廿幾年都唔想再數住,唔想再咁快慶祝(哈)。過時過節,寧願靜靜在家享受私人時光,你地班人俾我抖下得唔得呀。

 

一路睇一路好認同。咁無喇,堅老了。

【非經允許、不得轉載。POT.HK 獲授權刊載;作者:肥妹;原文標題:廿幾歲的生活初老症;好文章需要你的支持,請讚好 粉絲專頁

【此文章刊載於POT.HK;標題:肥妹:致廿幾歲的你,中哂就認老吧

‘關鍵字’ , , ,