小盛女:你豬唔緊要,但一隻態度差嘅豬真係好難頂

做完agency做in-house係咪會好啲?其實真係睇你點睇,我剩係覺得好嘔血。話說小盛女在agency捱了兩年便幸運地轉到大公司做in- house marketing,簡單來說,就是做「客」。

朋友說:「你咪可以點返人做嘢同鬧返人囉!」老老實實,其實我唔太鍾意叫人做嘢,自己做到咪自己做囉,費事麻煩人,而且如果遇著豬一樣的隊友,真係分分鐘改到你噴血。至於鬧人,以前做agency最憎啲客無理取鬧,係又鬧唔係又鬧,所以我發誓就算我做客都唔會亂鬧人。

可是上班一星期後我收到某agency的「傑作」,我終於開始明白有時點解啲客會咁躁。

正常有event就要寫rundown、採訪邀請、新聞稿及MC 稿,以新聞稿為例,格式錯都算啦,仲要成篇得三句同個event有關,其餘全部廢話,我起初以為我眼花睇錯,心諗點解句句都可以完全九唔搭八,後來當我同同事講返呢件事,諗住叫agency重寫時,佢竟然話因為呢間agency好平,所以質素差係好正常,仲同我講:「你以前做agency㗎嘛,呢啲嘢你熟晒啦,你自己寫咪得。」WHAT?我拎一份人工做兩份嘢,係唔係路啊你?咁我返去做agency唔好?荒謬。

唉好喇我認我係大隻講,因為我心入面鬧完一大輪之後我都係死死地氣自己由頭寫過晒啲rundown、採訪邀請、新聞稿同MC稿,因為時間太趕,我叫 agency重寫,來來回回又一兩日,始終咪又係我自己寫返,到時一定仲趕,然後趕唔切我又奶嘢,所以都係自己寫返。

其實我以為咁已經好激,點知 event當日仲激,唔跟rundown亂咁嚟都算,搞event為乜?出名囉,有media coverage囉!佢地夠膽死唔痴品牌sticker,更好笑係將sticker倒轉痴,真係心血少啲都比佢嚇死,我即刻仆出去痴返啱,因為如果比記者影咗相見咗報,奶嘢嘅又係我。

換轉係以前,如果我痴少一個sticker,我估應該都已經比人剷到上天,但係我呢間公司係唔鼓勵鬧人嘅,所以就算幾嬲都好,只可以笑住暗串幾句,試問大粒都唔鬧,我呢啲小薯仔可以點?就算我出聲,都肯肯定無人理。

可能因為大公司嘅關係,每次活動後都有好多media coverage,以前我做agency每日都會send clippings比客,因為遲一日都會比人打電話鬧爆,有時個客話趕,我就會仆落街買再即刻返公司scan比佢,因為呢個係以前公司嘅宗旨,顧客至上, 於是我又天真地以為所有agency都同我以前一樣,結果追咗一星期,一份clipping都收唔到,set咗deadline又點?

佢地完全唔跟,鬧佢?你有你鬧,佢有佢唔send比你,吹呀?同大粒講,只會換嚟一句:「佢地係咁,你自己做啦,好易啫。」WHAT?我當然知道易,但其實做 clipping report係好浪費時間,而且連呢啲都要我做,咁請agency做咩?發夢等收錢?

 

後來轉到第二間公司做in-house marketing,心諗應該唔會咁黑仔又遇到豬一樣嘅agency掛?點知一山還有一山高,小妹今次實在今拜下風。

話說今次想搵agency幫手寫個 post,比咗幾張相佢砌同口頭brief咗佢點寫,佢夠膽死就咁將幾張相拼埋,無框無effect,仲要啲相有直倒橫倒,佢一概唔理,就咁拼埋,有啲 cut走咗幾個人(差啲cut走埋老闆),有啲就sharp cut咗白色一片,我真係當場噴血!

我明白agency係同一時間接好多唔同公司嘅job,但都唔係hea成咁掛?大佬啊我用美圖秀秀1分鐘都砌得靚過你,咁嘅嘢你都send出嚟,除咗侮辱間公司,更加侮辱你自己,比我真係send唔出,正當我想鬧爆之際,post的內容亦隨即送到,xx(我們品牌的名字),然後第三個字佢就寫錯,點頂啊大佬!

我知我知,香港人有錯別字係好正常,我都成日寫錯,問題係今次連個word都自動用紅色間住咗話你知係錯,點解你都唔改?而且呢個唔係一個深嘅字,正常小學生都識,我直係唔明,究竟你有讀寫障礙,定係色盲所以睇唔到?

可能你覺得我好mean,一由agency變做客就擺晒款,但係我想講,做agency真係唔係咁做,可唔可以唔好再影衰做agency嘅人,我唔係要求你做到我以前公司咁顧客至上,但至少你都應該要有禮貌,唔好成日串串貢,你豬唔緊要,但一隻態度差嘅豬真係好難頂㗎you know?

P.S. 唔知點解呢篇好想用口語寫,發泄完畢,多謝收看。

【非經允許、不得轉載。POT.HK 獲授權刊載;作者:小盛女;原文標題:做完agency 做in-house 係咪會好啲;好文章需要你的支持,請讚好 粉絲專頁

【此文章刊載於POT.HK;標題:小盛女:你豬唔緊要,但一隻態度差嘅豬真係好難頂

‘關鍵字’ , ,