放鬆啲啦

ATV-e1390108113524

早前ATV上黎拍野,攝影師、燈光師、導演、助導、記者,夾埋成條crew上晒黎office,好大陣仗,就算之前〈新聞透視〉上黎,都係攝影師,燈光,同記者三個人,所以今次真係有啲受寵若驚。

Set好晒野之後,到我埋位,導演話:「你放鬆啲啦,好似平時咁就得架喇,我睇你平時講野都唔係咁細聲架啦。」

導演呢句說話真係打中我心坎,我一直都覺得呢排狀態麻麻地,原來問題個徵結就係一個字:「緊」。

我以前寫嘅Blog,甚至係Forum寫嘅文,可讀性可能比起收稿費寫嘅文仲高,近期情況更加明顯。而呢個情況,應該係因為呢期個人真係好「緊」。

文章寫得「緊」,除左冇咁好睇之外,仲會寫得慢。寫自己Blog諗住冇乜人睇,個人會輕鬆好多,寫都寫得快啲,錯字都唔駛check咁緊啦。

而家我最需要既就係將心態調節到任何時候都可以「不鬆不緊」,呢樣真係非常困難,是關做人真係太多野要諗,好多時都會「諗多左」,綁住左自己嘅思維,造成好大壓力。

人緊張,個腦就實,近排寫野都係以交稿為主,少機會寫自己野,越係想谷出黎就越冇野睇,無辦法之下唯有求其寫啲野,郁少少都好過完全唔郁。

有時會好懷念玩Forum嘅日子,以前用網名,冇人知你邊個,睇你寫野嘅人又係「都唔知係邊個」嘅網友,就算真係約出黎飲野唱K,都係只談風月,所以寫乜都 得,真係當日記咁寫,第日睇返得啖笑。而家唔同喇,生意上嘅朋友又會睇,屋企人又會睇,甚至連女朋友的家人都會睇,點寫呀。

每次有大單野搞,個人就會好緊,一條象筋拉到盡就會斷,但現實唔到你斷左就投降,斷左都要做架,最多係跛住跛住咁做囉,有時真覺得自己係賤骨頭,打工有幾痛苦?痛苦得過而家?

【此文章刊載於POT.HK;標題:放鬆啲啦

偉大航道
‘關鍵字’ ,