「把工作帶回家」是一片慢性毒藥

POT.HK:記位!千萬不要「把工作帶回家」。因為這是一片慢性毒藥,只要你做過一次,便永遠無法回頭。工作需要完結,儘管不完結不能回家,也不能放棄這個原則。

「份嘢返屋企再搞啦。」呢句可以話係大部份打工仔嘅常用句子之一。無論係自己講畀自己聽;同事話你聽;或你話畀同事聽、呢句「返屋企再搞啦」嘅出現率都奇高。

都係嘅,有時個頭已經痛到PK,天色已黑。你望住窗外嘅回家隊伍,都會忽然懷念逼到爆炸嘅港鐵車廂,思起鄉來。
你想收工。不過「想收工」同「可以收工」嘅距離往往相隔幾百個銀河系!

聽日份report、quotation、projectplan點都係要交;會議亦一定會進行。但你又真係好想返屋企!所以你心底會出現「返屋企先做啦」嘅諗法。

甚至隔離位嘅同事見成個人乾咁,都會好心一句:「你咁攰,返屋企抖下先做啦。」香港人好習慣呢種生活模式,返工係返工;放工都係返工。有人連發夢都關公司事。

習慣只因身邊人人如此,積少成多,聚沙成塔,自古少數服從多數,都市人照辦煮碗,同化其中。

不同幾年前有位朋友同我講:「我一定唔會帶嘢返屋企做。就算OT我都逼自己喺公司做曬先走。一放工我就唔會諗公司嘢,唔係咪冇曬生活?

 

加上試咗第一次帶嘢返屋企做,衰過吸毒,一定戒唔到!從此你心中多咗個『返屋企做』嘅選項,變相你喺公司會冇咁落力,因為你已經本能地將返工時間由9am至6pm變成9am至9am,

「廿四小時個心都係工作緊,遲早就痴孖根!」其實好有道理,9成香港人都係「公私不分」,公還公;私還是公。

勞碌幾廿載,得到一句GoodJob、一身樓債、數不清嘅目標(未完成)、幾百部冇時間睇嘅戲、千套未望到結局嘅連續劇、仲有呢場踢到67分鐘嘅fifa。

可惜,好多嘢你真係冇得揀,亦唔到你揀。呢排,同返嗰個朋友飲嘢,酒過三巡,佢話要返屋企做埋公司啲手尾。

我即刻問:「你唔係話死都唔帶工作返屋企㗎咩?」

佢笑一笑:「係呀,不過後尾我發覺,如果做曬先返屋企,即係唔使返屋企,哈哈。屈服咗啦。」

 

公司下的長街也許只是走廊,樓下花園像個Pantry,鐵閘大門內不是你的家,純粹是個較為自由的個人辦公室。這個「不帶工作回家」的堅持,我進入社會大學第3日就屈服了。

你又堅持到幾耐?

POT.HK:記位!千萬不要「把工作帶回家」。因為這是一片慢性毒藥,只要你做過一次,便永遠無法回頭。工作需要完結,儘管不完結不能回家,也不能放棄這個原則。

【非經允許、不得轉載。POT.HK 獲授權刊載;作者:張晨;原文標題:『將工作帶返屋企』就好似吸毒,試一次就返唔到轉頭;好文章需要你的支持,請讚好 粉絲專頁

【此文章刊載於POT.HK;標題:「把工作帶回家」是一片慢性毒藥

‘關鍵字’ , , ,