員工,才是一家公司最重要的元素

POT.HK:一家公司的員工才是最重要的元素,愈小的公司對於員工的待遇就必須更好。因為他們的中小型公司員工離開的成本相對較低,而且對於一些是以「人」為主的行業更是重要。作為老闆的你,有跟所有員工聊過天嗎?

「員工」

我經常講一間公司嘅成功與否,其實唔係淨係老闆一個嘅功勞。因為到最後落手落腳做嘢嘅人,好多時都嚟一班為你勞心勞力嘅員工。好彩嘅佢哋真係可以話幫你賣命,甚至乎可以講生係公司嘅人,死係公司嘅鬼。如果你慶幸公司有啲咁嘅員工,你都可以話三生有幸!當然唔係話老闆嘅個人能力唔重要,只不過要運作一間公司唔係淨係靠老闆一個。當然一個好老闆身邊通常都有好嘅員工!

 

「資產」

好多人會以金錢去衡量一間公司嘅資產,但係有一樣嘢係好難去衡量,呢樣嘢就係員工。一間正常嘅公司,其實可以話有七八成嘅人都應該係日日幫你埋頭苦幹嘅員工,其他嘅都係出謀獻策嘅軍師同一班可以訓練出一支攻守兼備嘅軍隊嘅將領。所以唔好睇少同忽視基層員工,事關影響深遠。當然有時都要平衡利弊,唔可以淨係由基層主導啦,所以管理係一樣好深嘅學問!

 

「幸運」

工作咗咁多年,老實講自己慶幸遇到唔少好嘅老闆,佢哋不斷俾機會同空間我發展,亦教咗我好多嘢。而係我管理團隊嘅咁多年,亦都慶幸自己有一班好嘅員工。對於我呢講,當然員工嘅發展同成長係好重要。我經常講,希望有日你會比我做得更好,去得更遠。而家睇返幾年前一手培訓出嚟嘅團隊,好多都已經係管理層工作,結咗婚生咗仔。試問作為一個老闆最大嘅成功感係乜?我自己就係睇到員工嘅發展比我好囉!

【非經允許、不得轉載。POT.HK 獲授權刊載;作者:Kenneth Kwok;原文標題:好員工;好文章需要你的支持,請讚好 粉絲專頁

【此文章刊載於POT.HK;標題:員工,才是一家公司最重要的元素

‘關鍵字’ , ,