阿強:接了一個「判上判」工作的苦況

識人好過識字,我阿媽細細個就開始教育我架啦,佢話「阿強,讀書唔叻唔緊要,識人最緊要,唔係你想做咩都做唔到」。細個嘅時候總覺得唔係好明阿媽咁講咩意思,J咗木村拓哉咁耐但係又唔見得我靚仔咗,直至到今日先知道句嘢係咩意思。

公司又再由其他 agency 度接到單,呢種做法其實行業裡面好普遍,就好似層壓式推銷一樣,佢地一層一層咁壓落嚟,咁最後嘢就會係你地呢 d袋底泥做,而錢就會係佢地分得最多,過程中又可以盡情咁捽到你地出水,簡直就係錢銀女人乜都有,又唔使負任何責任。

接呢種單,我地都係無機會直接接觸個客,而係由 agency負責 brief 個客想要 d咩有咩要求咁,但係因為 agency根本唔需要跟 execution所以大部分時間佢地都唔會問清楚個客要 d咩,求求其其講個大概就算數,到時錯咗又可以撳住我地係枱面嚟屌。

諗住問多兩句問清楚 d內容啦,俾人冷冷咁回一句「你做咗先啦,有咩問題我自然會話你聽」咁我地班賤民就要開始憑住個唔清唔楚嘅 brief,自己摸索個客究竟要 d咩。

經過來來回回 5,6次嘅改動個 agency 始終都話個客唔係想要 d咁嘅嘢,咁問佢究竟有咩 requirement,但係 send親 email 過去都會好似 whatsapp 去咗 working holiday 嘅女朋友咁,明明在線就偏係唔覆你。

今日又到咗 deadline,阿強已經有種俾 d怨婦榨乾嘅感覺,用盡力花盡身上每一滴精力去滿足佢都依然係木無表情咁講句「not good enough」。但係阿強突然靈光一閃,諗起有個 friend 子係個客度做,即刻打去問清楚哂 d detail,改好就 send 咗俾 agency。

『你好呀我係阿強呀,岩岩 send 咗最新 version俾你,你睇吓個客今次滿唔滿意?』

『其實都改咗咁多次,你地都無一次做到個客嘅要求,我都唔對今次抱太大期望,你地都係哂定再改要點做啦』

『哦係咩,你睇吓個客點講先啦』

聽到佢咁囂張嘅態度令我更加興奮,感覺就係鋤大 D揸出大 D等結,一諗起佢到時收咗皮要同我講話個客 approve咗都扯扯地。

【非經允許、不得轉載。POT.HK 獲授權刊載;作者:廣告界地底泥;原文標題:識人好過識字;好文章需要你的支持,請讚好 粉絲專頁

【此文章刊載於POT.HK;標題:阿強:接了一個「判上判」工作的苦況