這是一條 Dream team 必要的原素

如果你是70後,你又是男仔,那你一定會喜歡日本的卡通片,而咁多卡通片中,你一定會鍾意機械人片。當年的代表作又印象深刻的確是太多,可舉的例子比比皆是, 如超力電磁俠,宇宙大帝,六神合體…十隻手指數唔曬。當年睇到如痴如醉,書唔讀唔緊要,飯唔食都還OK,但冇卡通片睇就勢係假。

其實回想都幾好笑, 並不是笑自己當年的幼稚,因為那有不幼稚的童年?這類機械人卡通片簡單易明,故事一開始一定是一班人類在嬉戲,突然敵人出來攪破壞,開頭敵軍是很勁的,所以人類就無可奈何要call 正義朋友,而次次開頭又唔夠壞人抽,去到最「危險」嗰一刻,機械人都會出絶招KO 佢。跟手那班茂利總會坐在機械人肩上鳩吹幾句說再見。笑位是每次都期待主角的必殺技出現,而必殺技又每次都在最後才會出現,但為何要又要等到最後先出現?

還有這些片集總是有條人類的 Team,用途有兩個,一是用來說故事交待嚇劇情,而更重要的任務是用來凸顯人類的脆弱,背後是有股力量來支持著我們,是一個兒童希望被保護的心理反射。所有這類片集的人物設定都是這樣千篇一律: 先有一個講咗當做咗的粉腸,再有一個好 Cool 但有料到的角色,之後是一個心地善良,專做和事佬的智者,最後一定不少得一個辦事能幹,打點一切的女孩子。

人大了,才知道這個組合為什麼這樣時常出現,因為原來這是一條 Dream team 必要的原素,也是做好生意的夢幻團隊,他集創意、野心、務實和細膩於一身的黃金組合。不懂得做從不重要,最重要是懂得誰懂得做。像聶風步驚雲單拖從不夠雄霸抽,只有合併才能取他狗命。沒人可由球場後方一路帶波兼入埋,球隊奪冠一定是靠團隊的。

生意結果如何從冇人敢背書,但能成為這 Dream Team 的一份子,我好安心!

待續

【此文章刊載於POT.HK;標題:這是一條 Dream team 必要的原素

Thinkaholic.hk
‘關鍵字’ , ,