阿旺:你,是否也在等待「被辭職」

POT.HK:如果你每天上班的目的是下班,然後每個月都期望可以「被辭職」,那其實自已辭職也是一個不錯的選擇。人生還是要由自已來決定。

早排搞到滿城風雨嘅高官被辭職事件,睇完阿旺覺得好 inspiring,人生最成功莫過於被辭職。睇住班高官一個一個咁對住 d 傳媒解釋,可以聽到佢地嘅聲線充滿無比嘅激昂,就算外表睇起上黎有幾咁冷靜,都掩蓋唔到佢地打從心底散發出黎嘅喜悅。阿旺望住電視上面六點半新聞播出,一句又一句嘅大話完全震撼我嘅心靈,令我忍唔住好似睇緊 Obama演講咁,跟住佢對住電視大嗌

『Yes we can!』
可能有人會講,咁想走咪辭職囉,但係 the beauty of 被辭職,就係可以即刻執嘢走人,嘢都唔使同人講多句就可以 bye bye佢地條尾,散水餅都省埋,公司仲要補返代通知金送你走,突然得到一筆錢又可以去個旅行先再揾過第二間公司做奴隸,所以被辭職根本就應該係每個打工仔最嚮往嘅事情。

大家絕對唔可以睇少被辭職嘅難度,若過係因為觸犯員工守則而被辭職嘅話將會被扣掉代通知金,所以如何有效率地以低效率工作就變成阿旺工作歷程中最困難嘅一個課題。有時一個唔小心,又再 efficient 咗,搞到公司誤會咗我係一個有用嘅人,變相又 delay咗自己被人炒嘅時間。

有時阿旺被工作,被生活壓迫到無法呼吸嘅時候,會幻想吓如果被辭職嘅話會係點。。。。 一朝早老細叫我入房,同我講唔太滿意我最近嘅工作表現,決定係時候我再尋找一下適合自己嘅其他方向。阿旺由座位企起身,行到老細旁邊,老細可能做得衰嘢多自然反應地向後缩,阿旺單膝下跪,伸手將老細隻手帶到自己嘴邊,好似 godfather入面 d嘍羅咁親吻佢嘅右手,感謝上帝終於回應我嘅訴求:

我自由了

【非經允許、不得轉載。POT.HK 獲授權刊載;作者:阿旺;原文標題:我自由了;好文章需要你的支持,請讚好 粉絲專頁

【此文章刊載於POT.HK;標題:阿旺:你,是否也在等待「被辭職」

‘關鍵字’ , , , ,