阿強:工作,必須在夢想與現實之間找到平衡點

POT.HK:雖然「做人無夢想同條鹹魚有咩分別」不是古云,但我們在面對工作時,必須在夢想與現實之間找到平衡點。

唔知大家最鍾意邊部周星馳嘅電影?周生嘅電影之中《功夫》同《少林足球》分別佔據周生自己嘅票房頭兩位,我自己就鍾意少林足球。(當年我入戲院睇左3次, 大家有印象嘅話,應該記得後期上映嘅係加長版本。)

古語有云:「做人無夢想同條鹹魚有咩分別!」呢張cap 圖係呀強部電腦set 左好耐嘅wallpaper用黎提醒自己,通常都會比行過嘅同事望下笑下,或者比人話我搏人注意都試過 。但其實呢張cap 圖唔係就係好似我地嘅夢想咩?wallpaper 本來就係我地當初為自己設定想見到嘅野,但無奈地工作會令你被迫打開outlook、excel同 powerpoint。又或者惰性會令你打開高登、9gag或者This AV 。唔同嘅因素都會令你嘅wallpaper被遮擋或者受到旁人嘅嘲諷。少林足球當中,其實班師兄弟都好熱愛功夫,但要係夢想同現實嘅裂縫之間掙扎並唔係咁容易。

人到左某程度就會開始尋求安定,而呢種嘅程度,我相信香港嘅高級程度會考就已經令唔少學生捨棄左自己嘅夢想(當中最出名嘅叫呀James),出左黎社會工作之後薪酬程度嘅高低影響更甚。有無記得當年你同籃球隊隊友講過要稱霸全國打敗山王?

但現實就令你成班隊友好似少林足球班師兄弟咁支離破碎,當年苦練嘅鐵頭功亦會被迫荒廢,一畢業大家都有唔同去向,返shift 嘅返shift、返大陸嘅返大陸、而ot嘅ot。大家除左人工連地域時間都有唔同程度嘅差異,你仲諗住安西教練我想打藍球?可能只會落得大師兄嘅一句:「我有我嘅生活,你有你嘅撻火,我要搵食嫁大佬!」

當然,如果你好似故事中可以係夢想同現實之間找到平衡點,做自己鍾意做嘅野當然值得開心。而從事廣告嘅我,成日都會問自己其實呢份工係咪岩我,或者我岩唔岩份工?尤其呢個網上群雄割據,一街都大文豪youtuber 嘅時代,發圍仲係咪咁易呢?你所諗嘅少林功夫加唱歌跳舞又有無人buy?

曾經有人問我:「呀強!呢行一係湊客,一係數字,一係文字,一係設計嫁姐~點都有樣岩你掛?」呢一刻我唔知,但就算做鹹魚我都要做最鹹個條,唔可以咁易比人食住。

【此文章刊載於POT.HK;標題:阿強:工作,必須在夢想與現實之間找到平衡點

廣告界袋底泥