阿旺:同行,往往是更難對付的合作伙伴

POT.HK:最難對付的敵人,往往是自己。縱使現實中不需要對付自己,但同行卻是最難對付的。如同行合作,有時候是直接扔進地獄。

同其他 Agency 合作,你以為佢地同樣身為 Agency 應該會比客人更明白你嘅苦況,畢竟佢都一定有經歷過同類型嘅處境,會有同理心而對你更為寬容,但其實 Agency 往往係更難對付嘅人,因為佢地比起客人會更識?嘢,更識壓榨我地。

喺佢嘅客人同我地呢種算係 Service Vendor 之間,Agency就一定係站喺客人嗰邊對我地施予精神層面同身體上面嘅各種凌虐。(Between只係指某一D我地有接觸嘅 Agency)

今日阿旺食完飯後收到個電話,電話另一頭嘅 Agency 語調出奇地冷靜,無幾耐佢就開始發動攻勢。

「之前條片大致上無咩問題,不過你同我改一改,想個 Theme 再 bright 少少,我想要有小朋友第一次食開心樂園餐咁開心」

「你咁講即係全條片要再拍過架啦喎,一早講好係拍到 Batman 咁嘅 Feel,好難就咁話改就改哂成個 Theme」

「我已經應承咗個客架啦,你幫我補拍兩三個 Shot 姐好簡單」

「如果要補拍要加錢,要揾 Talent 再拍過我地都要再俾錢,一係手頭上有嘅 Shot 你睇睇你要邊D,我再幫你問吓剪接上有無辦法配合啦」

「睇過哂啦之前,係可以用到嘅就唔會要你補拍啦,錢就無架啦,你自己諗方法整掂佢,聽日個客就要」

「唔加錢真係無辦法」

其實講到呢度大家講來講去都係得三篤屁,佢最後出必殺技。

「咁你改唔改呀?唔改我就同你 Manager 講」

其實搞到好似小學雞咁用威脅嘅口吻講話 “哦你死啦…我話俾老師知” 又有咩為呢?我當堂呆咗一呆,後尾唯有同佢講

「唔改」

【非經允許、不得轉載。POT.HK 獲授權刊載;作者:阿旺;原文標題:客戶;好文章需要你的支持,請讚好 粉絲專頁

【此文章刊載於POT.HK;標題:阿旺:同行,往往是更難對付的合作伙伴