阿旺:與客戶談情,是一段必定失戀的愛情

POT.HK:這也許解釋了為什麼工作得愈久,對工作的熱情愈少。作為一名打工仔,除了工資外,更想得到的也許是成功感與被人認同的感覺。

每次阿旺跟一單job,都好似拍咗一場轟天動地嘅戀愛。

「吸引」

剛剛認識一個新客戶,過程充滿住新鮮感,佢嘅一舉手一投足都深深咁吸引住你,你好投入咁聽佢嘅每一句說話,甚至見完面返到公司佢嘅影像都一直係你腦海中揮之不去。

你會一直諗住自己同佢之間有着無限嘅可能,有一個咁樣嘅人係你生命中嘅呢個時候出現簡直就係上天嘅安排,你好用心準備好一切,想盡自己最大嘅能力係下一次見面時能夠令佢滿意,哪怕只係博得佢嘅一個微笑係你心目中都已經係最好嘅回報。

 

「談判」

你準備咗一整個禮拜,連續四晚不停咁趕工,只係為咗呢一日再上佢office同佢表達你心裡面嘅一切。其他同事勸你唔好太過投入,警告你投資太多自己嘅時間同精神最後受到傷害嘅都只會係你自己。

你好用力咁否定佢地嘅睇法,你話佢地知今次感覺完全唔同,呢個客俾你感覺到你地之間有一種微妙嘅感覺,絕對不能夠同之前d失敗嘅案例混為一談。只有你唔知道,將會好快就發生一連串嘅事令你想坐時光機返黎bitch slap今日咁天真嘅自己。

 

「投入」

見面後係電話上得到佢嘅一個 『yes』而順利確認彼此的關係,心裡面一陣澎湃同激昂但係理性話你知你要保持鎮定,接落黎嘅幾個月先係證明俾人地睇,證明俾當初每一個唔睇好你呢單job嘅同事睇,你地會排除萬難,會係廣告界嘅羅密歐與朱麗葉,將會譜出一段可歌可泣嘅動人故事,但亦都係呢種無知,令自己慢慢步向羅密歐與朱麗葉嘅結尾。

 

「崩壞」

個campaign開始出現問題,你地兩個之間嘅信任亦都逐漸瓦解,原本每日返到公司最期待聽到嘅聲音,宜家已經變成最刺耳嘅噪音,每次接起電話前都會將原本係你心中最重要嘅佢臭罵一輪,講完該講嘅重點後連再見都唔講就急不及待掟佢電話。

一直努力否認,唔想就咁俾各位同事睇死,但都係忍唔住放工後捉住d同事訴苦,你唔明白究竟係佢變咗,定根本佢原本就係一個咁嘅人,只係佢一直都無顯示過佢嘅呢一面。

 

個campaign草草完成埋,大家各行各路,以後提起佢個名,都只會大嘆自己當初幾咁愚蠢,發誓話下次一定唔會重蹈覆轍,話自己已經從傷痛中學懂愛惜自己,但係到咗下一個客嘅出現,成個cycle 又重新黎過。

【此文章刊載於POT.HK;標題:阿旺:與客戶談情,是一段必定失戀的愛情

廣告界袋底泥