阿旺:公司裡有個靚女,生活可能特別「慘」

POT.HK:好多朋友羨慕別人的公司裡有美女同事,但事實往往與你看到的背面並不一樣。

朝早十一點,我又遲到了。

趕頭趕命返到公司仆埋自己個位度,想扮到好似唔係遲到咁,但係身邊嘅同事已經即刻大聲話「你返黎啦阿旺,好早wor今日」。

博命咁叫佢地唔好咁大聲,會俾我team head聽到,佢地就好似俾人鞭打緊嘅 M仔一樣越叫越大聲,突然身後嘅大門傳黎好大聲嘅「砰」,空氣都瞬間凝結咗咁,原來係阿瑩返咗黎。

阿瑩佢坐我隔離,係典型嘅靚女,樣貌有87%似2015年度港姐冠軍麥明詩。雖知道靚女天生真係有好多着數,遲到無人話,日日見到阿瑩望住個mon,份powerpoint完全無郁過停留係同一頁,都知份proposal同佢夾嗰part都係要自己做埋架啦。

離開收工前40分鐘,team head走過黎問阿瑩「你做緊咩呀,幫我搞咗份report先,趕住出街架」

阿瑩個頭都無擰過去,只係眼尾向上眺咗一下話「我好忙呀,唔做呀」旁邊嘅男同事就即刻走過黎佢隔離位,將我連人帶櫈推開「點呀好忙呀?」

兩隻手仲順便開始幫佢按摩肩膀,阿瑩都好收落,扁住嘴講「好累呀..」搞到team head 都懶得理佢地,就拍拍我膊頭話 「咁阿旺你幫我搞掂埋佢啦」。

突然間要幫人地執手尾而OT,而阿瑩就用咗收工前半個鐘頭補埋個妝就走咗,忍唔住鼻頭有少少酸,唯有食住自己個OT飯盒,睇住廉航機位黎開解自己。

其實同事成日話我鐵漢柔情勝過黎明,即係都無咩其他地方讚得落,係一個輸在起跑線嘅廢柴,所以我每朝都提早兩個鐘起身去做gym,希望有一日可以操到好似彭于晏咁樣,但係估唔到每朝早嘅辛勞,都唔及扁兩吓嘴咁具殺傷力。

第二朝早,我帶住勝利者嘅微笑返到公司,見到阿瑩已經係位,就特登提高聲線同佢講「你琴日有無check廉航呀?我買到$1機票呀」

心諗 IN YOUR FACE BITCH, 點知佢照樣愛理不理咁回我「哦係咩,咁幾時飛呀?」「下個月尾呀」「噢我都請咗假wor,我諗你唔會批到假架啦」

男同事好快就撲上黎問「你請假去邊呀?」「我有個bankerrr朋友請我去蘇梅島玩呀,坐business class」。

此時此刻我嘅心情差到一個極點,自己諗住炫耀一下點知俾人反將一軍,但係上天都唔係咁絕情,清潔伯伯從後拍拍我膊頭,同我講「靚仔都係你最好」。

好耐都無俾街市阿嬸以外嘅人讚過靚仔嘅我壓抑住沾沾自喜嘅心情,索返起就快流出黎嘅眼淚話「叔叔,you made my day」。

阿伯回我話「尾咩地話?」「我講真架,咁多個人入面,靚仔你張枱最乾淨最容易抹架啦」

阿伯,MANY THANKS

【非經允許、不得轉載。POT.HK 獲授權刊載;作者:阿旺;原文標題:靚女同事;好文章需要你的支持,請讚好 粉絲專頁

【此文章刊載於POT.HK;標題:阿旺:公司裡有個靚女,生活可能特別「慘」

‘關鍵字’ , ,