阿旺:做廣告,也要同時做埋緝毒犬

作者:廣告界袋底泥

公司早排接咗個event,活動當日要搞抽獎,咁當然禮物都要幫佢諗埋買埋啦。

對口今次有兩個人,黎到event前一日,個客唔知做咩忽然開始用腦,其實好多客都係咁,會突然間好似青春期咁玩叛逆,又覺得自己好有想法,兩個人好似棟篤笑咁一唱一和同我con call 。

「呀,不如其中一樣禮物轉做藍莓」「係呀轉做藍莓」「藍莓要買california嘅」「係呀california嘅最好食」捲脷捲到發發聲

我答返佢「其實宜家都成六點幾,要買到咁多盒藍莓都唔係咁容易,不如照返之前講嘅咁送返之前樣禮物啦」

「我唔理呀,我要藍莓」「係呀要藍莓呀」, 「我聽日朝早開始event之前要見到100盒藍莓呀,要california架」「係呀記得california呀」

其實都無時間再諗點解佢地咁執著於california藍莓,可能佢地兩個當年都係俾california藍莓食咗個處所以宜家對佢咁迷戀。

Event當日,幾經辛苦幫佢買齊佢要嘅california藍莓,仲要太監仔咁笑住口將d藍莓呈上,點知兩條木嘴又問:

「你點確保d藍莓無毒?」「係呀有毒點算」

我確實唔識答「umm…我都係做廣告嘅,唔係好識生果嘅嘢,唔知你有無咩好方法可以教我呢?」

「我唔知,不過總之你要同我確定無毒嘅,我要派俾客我唔要孭飛」「係呀有咩事你要孭飛」

我已經無言以對,唯有同佢講「一係咁呀,一陣我每粒藍莓咬一半,我event完唔死嘅就應該係無毒嘅,咁就派得啦」

【此文章刊載於POT.HK;標題:阿旺:做廣告,也要同時做埋緝毒犬

‘關鍵字’ , , ,