阿強:Happy Friday 真的 happy 嗎?

POT.HK:真的有休息過嗎?

作者:廣告界袋底泥

每每一到星期五,每個social media platform都會有一大堆關於 happy friday嘅 post湧現,睇得出大家都好嚮往到星期五得到一種解放嘅感覺。

五點幾開始望住隻錶,一到放工時間頭也不回就仆去蘭桂坊,好唔容易揾到個離地下唔夠一尺高嘅櫈坐低,再係跟住嘅幾個鐘頭要不停咁俾d係人縫中間穿過去廁所嘅人用jj磨你嗰個一早已經滲滿汗水嘅背脊,舉起一杯冰塊多過飲料嘅cocktail,同朋友興奮地碰杯,大叫一聲「Cheers its friday」心裡面頓然自己好似真係relax緊咁。

坐到自己雙腳一齊無哂知覺,朋友講d咩都其實唔係好聽得清楚,腦裡面都仲係擔心緊下個禮拜個要出街嘅report唔知點呢,大家繼續各自強顏歡笑,見到朋友好似就黎講完,就求其發出罐頭笑聲兩下,扮到好全程投入。

十二點幾,到咗糧尾根本無錢坐的士,呃d friend話咩聽日朝早約咗人樂遊郊野,要埋單走先,身上面得返一張500紙,忍住骨肉分離般嘅痛楚將佢丟低,仲要扮埋大方請埋其他幾個人,再講句話咩”下個禮拜再飲過啦,唔係唔飲呀”就趕去搭尾班地鐵返屋企。

上到地鐵人多到差唔多人疊人咁濟,聞住人地個格甩底慢慢fing到返屋企,沖完個涼終於可以攤低係自己張床上面,揾返d外國嘅「fuck this shit it’s friday」改圖黎轉載再加一堆標準嘅 ‪#‎HKIG‬ ‪#‎TGIF‬ ‪#‎BFFS‬ ‪#‎relax‬ (下略大約2000字嘅hashtag),覺得自己其實好識享受人生。

其實大家有無休息過?

【此文章刊載於POT.HK;標題:阿強:Happy Friday 真的 happy 嗎?

‘關鍵字’ , , , , , ,