阿旺:你以為廣告業係充滿創意充滿奇妙體驗嘅地方?

成日響 fanpage叫春嘅阿旺,由幼稚園開始已經對自己嘅未來抱有好多唔同嘅幻想。記得第一次寫 『我的志願』,有 d人好行咁寫要做律師,因為如果不幸遺傳到雄性禿頭都可以日日戴假髮;又或者話做醫生,因為唔知呀,老豆老母話做醫生日日 on9 36小時咁先算有前途;

而阿旺就唔同呢,天生生成一條做廣告嘅賤命,細細個已經識得搵 reference,參考過唔同人嘅意見之後覺得都係科學家最適合我,但究竟科學家係咩,我到宜家都唔係好知,認知中科學家咪 d假新聞入面做假研究嗰 d人囉。但細個嘅時候的而且確深信,無論第時做 d咩,世界都會因為我存在過而有所改變。

但係人越大夢想就越細,由開初想改變世界,到中學已經調整到希望畢業人後可以努力做嘢回饋父母,大學讀咩已經唔係好 care,畢到嘢無欠落成身卡數已經當自己贏咗,到畢咗業求其有份工就算。

宜家呢?阿旺琴晚突然有咗個小覺悟,自己竟然已經卑微到因為收工時仲見到太陽而興奮咗13分鐘,痾完篤尿之後太陽就已完全咁消失於地平線。而當初嘅夢想,早就忘記得一乾二淨。

 

畢業後諗都無諗過就投身咗廣告行業,嗰時根本連廣告係做 d咩都唔知,只係知道個 manager打俾我話想請我,份工係有糧出嘅就應承咗。返工第一日發現按門鐘有人開門俾我,隨口問句你咁早嘅,佢話佢準備走啦。

聽完仲心諗九點幾鐘已經放工咁好嘅,再由同事帶埋位,坐到十二點都唔夠一半人返工,但係單純嘅阿旺到嗰一刻都未察覺到有問題,仲覺得新公司好正好 free,到晏晝都唔使返工。到慢慢開始理解自己要做 d咩,發覺自己原來只係一隻廉價嘅 report 製造器。你以為廣告業係充滿創意充滿奇妙體驗嘅地方?

大部分行業內嘅底層員工都只係電腦操作員,上層嘅人要你做 d咩,你就做 d咩,唔好問點解,亦唔好嘗試表現個人風格,對上層嘅人嚟講一個完美嘅員工就係一個無思想無意見無質疑嘅人,你想問清楚 d背景了解多 d? NO, 我叫你做咩咪做咩囉;你想加入多少少個人元素多一點創意?NO,你識條春咩我叫你做咩咪做咩囉,我做咗呢行咁多年使你教。做好交上去,第一句通常都係,

『點解次次交俾我 d proposal都一模一樣,你可唔可以變吓,俾 d創意嚟睇吓?』

『hmmm… 你叫我咁做』

『咁你唔使用吓個腦嘅?咁請你嚟做乜,我請舊叉燒得啦』

我一路都以為生叉燒係我阿媽嘅特殊技能,點知原來連請員工都可以請叉燒嘅

『咁叉燒識唔識咁做』

我把拳頭舉起,收起手指公食指無名指尾指,把手在他面前來回搖晃10次,係地下執僅餘嘅尊嚴,離開了。

當然上面嘅都只係我個人嘅幻想,無骨氣嘅阿旺,俾人話完,就乖乖地走返埋位 OT完成埋我 d要創意得嚟唔太有創意嘅工作,望住已經窗外已經天黑嘅天空,我發覺我嘅夢想又再一次縮小,我嘅夢想已經變到只係希望可以準時收工。

【非經允許、不得轉載。POT.HK 獲授權刊載;作者:阿旺;原文標題:Lesson 2;好文章需要你的支持,請讚好 粉絲專頁

【此文章刊載於POT.HK;標題:阿旺:你以為廣告業係充滿創意充滿奇妙體驗嘅地方?